– Det er ungdomane som gjer at dette går an å få til

– Det er ungdomane som gjer at dette går an å få til, seier ungdomskoordinator i Austrheim kommune, Ingrid Bø Marøy.

Det er ungdomskoordinatoren og dei frivillige ungdomane i kommunen som står bak Havglede, eit familievenleg arrangement med aktivitetar i og ved sjøen. I sist veke var planen å ha familiedagar ved Mastrevik kai heile veka, samt andre arrangement som snorkling i Øksneset. Dessverre vart mesteparten avlyst på grunn av dårleg vêr.

Mykje av programmet vart erstatta med opne dagar i Austrheimhallen, men på søndag, siste dag i Havglede-veka, vart det endeleg roleg og fint nok vêr til at ein kunne samlast på Mastrevik kai. Dermed var alt duka for fiskekonkurranse, bading og anna sjømoro.

– Det er veldig fint for oss å i alle fall ha fått nokre dagar ved sjøen, seier ungdomskoordinatoren.

Fisking på Mastrevik kai — FISKING: Ragni, Ronja og Luna testa fiskelukka på Mastrevik Kai.

Frivillige ungdomar

Med 17 påmelde fiskelag, ei stor auke frå i fjor, krevst det litt å gjennomføre eit slikt arrangement. Ungdomskoordinatoren styrte skuta, og frivillig hjelp frå Odd Martin Austrheim sikra solid fiskekompetanse til gjennomføring av konkurransen. Resten av arbeidet stod lokale ungdomar for.

Slik har det blitt skapt aktivitet i Austrheim i mange år. Miljøet rundt ungdomskoordinatoren og ungdomens hus gjer at mange ungdomar har lyst til å bidra.

To av dei er Henrik Thorsen og Sander Bruaas. Dei skal begynne på vidaregåande denne hausten, og har begge vore med sidan dei begynte på ungdomsskulen.

– Vi har vore med på ungdomsklubben som regel kvar gong, og får vi spørsmål om å hjelpe med noko så seier vi ja viss vi har tid, fortel Sander, som også er aktiv i det lokale ungdomsrådet.

Denne veka har dei vore med og rigga i stand til open hall, og elles bidrar dei med mykje hjelp og arbeid gjennom heile året. Det inneber blant anna å lage til ulike arrangement, og bidra med rydding eller andre større og mindre oppgåver.

– Eg har blant anna hatt nokre timar med rydding inne i kaihuset, og pumpa luft i hinderløypa som ligg i vatnet, fortel Henrik.

Ungdomane liker å bidra til å skape aktivitet, i tillegg til at det er sosialt å vere i lag med andre ungdomar.

– Det er eit godt miljø, og vi har det kjekt i lag, seier Sander.

Godt opplegg gjennom fleire år

Ingrid Bø Marøy har starta sitt fjerde år som ungdomskoordinator etter at ho tok over for Anita Soltveit som hadde jobben dei 13 føregåande åra. Ingrid fortel at ho kom inn i eit godt etablert system med ungdomar som ønskte å engasjere seg.

– Frå dei går på barneskulen ser dei kva som føregår, og får lyst til å vere med når dei blir ungdomar sjølve, fortel ho.

I tillegg til den frivillige hjelpa frå ungdomane, er det gode rutinar for å søke om økonomisk støtte frå ulike aktørar. Til Havglede har dei fått støtte til utstyr og drivstoff, og til litt løn til ungdomane som normalt sett jobbar gratis resten av året.

– Dei som jobbar løna i dag, er dei som har vore mest med som frivillig resten av året, forklarar Ingrid.

Ho fortel at ungdomane er med på heile prosessen, frå planlegging og innkjøp til gjennomføring og rydding.

– Kva betyr det for Austrheim?

– Eg trur det betyr veldig mykje. Viss ikkje ungdom har noko å gjere på, veit me at vegen kan vere kort til veldig mykje negativt. Her får dei ansvar, tillit og meistringskjensle, og det trur eg betyr mykje, svarar ungdomskoordinatoren.

Havglede — I VATNET: Ole Marius Davidsen stilte gjerne opp då avisa ville vere med på tubekøyring. Han fortel at vatnet ikkje var altfor varmt.

Tubekøyring — POSERTE: Å sitte i tuben utan å halda seg fast var ingen problem for Ole Marius.

Utfordra ordføraren

Fiskekonkurransen vart ein suksess, og etter to timar med intensiv fisking samla laga seg ved kaien for premieutdeling. Det vart delt ut premie både for største fisk, minste fisk, mest merkverdige fangst og beste lagnamn.

I tillegg til fisking var det nokon som prøvde seg på kajakkpadling, medan andre lekte i hinderløypa i vatnet.

Bading ved Mastrevik Kai — HINDERLØYPE: Nokon prøvde seg i hinderløypa.

Dei aller tøffaste testa motet i tube, og då ordførar Morten Sognnes tok turen innom kaien, var ikkje ungdomane snaue med å utfordre han til ei runde bak båten.

Den utfordringa tok han på strak arm. Med Henrik Thorsen og Emma Sleire Hopland bak rattet på båten, gjorde ordføraren det han kunne for å halde seg fast. Det gjekk berre nesten, for han hamna til slutt i vatnet.

– Det var kjempekjekt, men eg fekk meg ein smell i armen, lo ordføraren, då han var kome trygt på land att.

Ordføraren i tube — TUBE: Slik såg det ut då ordførar Morten Sognnes prøvde å henge på tuben.

Ordføraren i vatnet — VÅTT: Ordføraren klarte ikkje å halde seg tørrskodd.

Båt på Havglede — TOMMEL OPP: Ordførar Sognnes var godt nøgd med turen han fekk frå Henrik Thorsen og Emma Sleire Hopland.