Fleire vidaregåande-klassar til Austrheim

Den tredje inntaksrunda, og det endelege opptaket for alle med rett til vidaregåande opplæring i Vestland er klart, og som venta er det blitt oppretta ei rekke nye klassar for å ta hand om ei auka søkarmasse. I alt blir det oppretta 24 nye klassar rundt om i fylket.

Tre av desse kjem til Austrheim vgs. Der blir det oppretta nye klassar innanfor teknologi- og industrifag, bygg og anleggsteknikk og påbygg.

Samstundes mister Austrheim køyretøy-klassen på grunn av for få søkarar. Inntaket til denne klassen vart tidlegare i sommar sett på pause av fylkesadministrasjonen, men starta opp att av politikarane etter eit ekstramøte i opplæringsutvalet midt i juli.

I same møtet fekk fylkesdirektøren fullmakt til å opprette nye klassar for å handtere dei ekstra søkarmassane, og med det endelege inntaket gjennomført blir fasit for Austrheim at dei mister éin klasse, men får tre nye for komande skuleår.