Ny veke med ferjetrøbbel
Fredag morgon er "Fedjebjørn" tilbake i rute etter ei veke fylt med ferjetrøbbel for Fedje-sambandet.
I løpet av den siste veka har det jamt og trutt tikka inn driftsmeldingar frå Fjord1 knytt til ferjesambandet mellom Fedje og Sævrøy.
Det starta med innstilling laurdag føremiddag, då siste dag med EM i havfiske gjekk av stabelen. Då stod sambandet stille i kring halvanna time på grunn av "driftsproblem".
Tysdag ettermiddag kom det nye meldingar om "driftsproblem". Først vart 14.35-avgangen frå Fedje og 15.15-avgangen frå Sævrøy kansellert, før det vart meld om vidare innstillingar ut dagen, og at reserveferja "Solskjel" skulle bli sett inn i løpet av kvelden.
Det vart også sett opp skyssbåt for å frakte passasjerar fram til reserveferja var på plass.
Halv ni tysdag kveld gjekk reserveferja inn i rute, men Fjord1 melde at den fyrste rundturen onsdag morgon måtte avlysast på grunn av pålagt kviletid.
Onsdag føremiddag vart i tillegg 11.10-avgangen frå Sævrøy og 11.50-avgangen frå Fedje kansellert.
Torsdag vart det meld om nye "driftsproblem", og to rundturar midt på dagen og tidleg ettermiddag vart innstilte og erstatta med skyssbåt.
"Fedjebjørn" har lege til kai ved Steinestø for å få orden på problema, og fredag morgon sette ferja kursen for Nordhordland att. Ferja er no tilbake i rute.
Les også: Ferjefrustrasjon i juni etter veke med innstillingar