Diskusjonar om nytt helse- og omsorgstun

Austrheim kommune treng nytt omsorgssenter. Dagens sjukeheim, Nordliheimen, har "behov for endring av romfunksjonar, funksjonalitet, planløysing og krav til universell utforming", i følge ein tilstandsanalyse frå 2022.

Same år gjekk politikarane inn for å starte eit arbeid med å planlegge eit nytt helse- og omsorgstun.

Saka har sidan den gongen vore fleire gongar fram og tilbake mellom politikarane, kommuneadministrasjonen og innleigd konsulentselskap. Framleis har ikkje den mest sentrale avgjerda blitt tatt, nemleg kvar helse- og omsorgstunet skal byggast.

To alternativ

Det står per dags dato mellom to alternativ. Anten bygge nytt der Nordliheimen er plassert i dag, eller bygge nytt på nordaustsida av Austrheimhallen (omtalt som “tomt 5”).

Eit tredje alternativ ved å bygge helse- og omsorgstunet på tomta nord for Mastrevik torg, der brannstasjonen er plassert, var lenge aktuelt, men vart nedrøysta i kommunestyremøtet 1. oktober i fjor.

I det kommunestyremøtet vart det i staden gjort vedtak om å starte opp “skisseprosjekt” for dei to gjenverande alternativa.

Det er det politiske levekårsutvalet som har blitt utpeikt som styringsgruppe for arbeidet med helse- og omsorgstun, og 3. november fekk dei ei løypemelding frå Sweco, som er konsulentselskapet som skal utarbeide skisseprosjektet.

I løypemeldinga oppsummerte dei kort at tomta ved Austrheimhallen vil gje meir fleksibilitet, men meir naturinngrep, samanlikna med å bygge på same tomt som sjukeheimen er plassert i dag. Samstundes gjev dagens plassering potensielt moglegheiter for å gjenbruke delar av bygningsmassen.

Men politikarane i levekårsutvalet/styringsgruppa sat att med mange spørsmål då dei skulle diskutere vegen vidare i eit nytt møte 1. desember. Då var dei samla for å vedta ei tilråding før ei endeleg handsaming i kommunestyretmøtet 11. desember.

Gode nok utgreiingar?

Usikkerheitane til levekårspolitikarane handla mellom anna om kostnadsbiletet for dei to ulike alternativa. Det vart også stilt spørsmål om utforminga av eit nybygg ved Austrheimhallen, særleg knytt til kor mange etasjar ein skal bygge. Medan fleire politikarar tidlegare hovudsakleg har peikt på nybygg på eitt plan, presenterte Sweco skisser med nybygg på to plan.

Politikarane ynskte også betre svar på om det er mogleg å kombinere bygging av nytt omsorgssenter der Nordliheimen ligg i dag, med drift av Nordliheimen i byggeperioden.

Generelt sett var politikarane usikre på om dei kom til å få dei svara dei var ute etter gjennom det pågåande skisseprosjektet, eller om dei skulle sende ei oppdatert bestilling til konsulentselskapet.

Levekårsutvalet kom til slutt fram til eit vedtak. Dei ville gå inn for å be Sweco om:

• eit nytt forslag til plassering på tomta ved Austrheimhallen, hovudsakleg på eitt plan.
• eit forslag til korleis ein kan løyse utbygging og drift ved Nordliheimen.
• eit kostnadsanslag for begge alternativa.

Vil vite meir om moglegheitene på tomt 5

11. desember var kommunestyret samla for ta stilling til saka.

Leiar i levekårsutvalet, Terje Håland (Ap), oppsummerte bakgrunnen for utvalet si tilråding.

– Kommunedirektøren anbefalte oss å gå gjennom kva vi i styringsgruppa var usikre på, kva vi lurte på og kva vi tenkte at Sweco kanskje ikkje i den løypemeldinga svarte godt nok ut. På bakgrunnen av det er desse tre punkta kome opp, sa han til kommunestyret.

Han presiserte vidare at han ikkje kunne seie sikkert at dei tre punkta ikkje uansett kjem til å bli svart ut når Sweco leverer sitt endeleg arbeid.

Det første punktet i styringsgruppa si tilråding handlar, forutan om å få ei skissert løysing av nytt bygg på eitt plan, også om den eksakte plasseringa i området rundt Austrheimhallen. Det handlar mellom anna om å unngå bygging i myr, og påverkar mellom anna kor mange grunneigarar som blir involverte i prosessen.

– Viss vi som styringsgruppe på eit seinare tidspunkt skal gje ei best mogleg anbefaling til kommunestyret, ser vi det som teneleg at vi får ein litt grundigare presentasjon av moglegheitane på tomt 5, oppsummerte Håland i kommunestyremøtet.

Politisk diskusjon

Den politiske diskusjonen i kommunestyret handla om ein skulle legge inn styringsgruppa sitt forslag som ei ekstrabestilling til Sweco, eller venta til skisseprosjektet deira var klart, og så følge opp saka derifrå.

– Eg føler at det kanskje er litt forhasta å gjere eit vedtak no når skisseprosjektet ikkje er fullført, kommenterte Dag Arne Solberg (H).

Han la difor fram eit forslag om å ikkje sende noko ny bestilling til Sweco.

Ap-politikarane argumenterte derimot med at det var viktig å nytte moglegheita til å få konkrete svar på punkta til styringsgruppa.

Per Lerøy (Ap) var tydeleg på at han ønskte å følge levekårsutvalet si tilråding.

– Eg opplever det veldig dramatisk viss kommunestyret går imot ei samrøysta styringsgruppe, sa han.

Men Høgre fekk mellom anna med seg Senterpartiet, og sikra dermed fleirtal for sitt forslag.

– Eg ser ikkje heilt kvifor vi må gjere denne bestillinga no, og ikkje kan vente til skisseprosjektet ligg føre oss, sa Bjørn Inge Dyrkolbotn (Sp).

– Viss vi går for vårt framlegg, får vi etter vårt syn litt meir informasjon når skisseprosjektet er ferdig, kontra Terje Håland (Ap).

Fleirtalet gjekk for å ikkje sende noko ny/ekstra bestilling til Sweco. Dermed gjenstår det å sjå om politikarane får dei svara dei treng for å ta ei avgjerd om kvar eit nytt omsorgssenter skal plasserast.