– Då eg kom på fylkestinget og skulle forklare litt om Masfjordsambandet, fekk eg inntrykk av at mange trudde dette var ei lita lokalbru i Masfjorden som skulle hjelpe eit par-tre hus på kvar si side av fjorden. Då er det viktig for oss å formidle at det er langt frå tilfellet.

Slik forklarte ordførar i Masfjorden, Erlend Kvamsdal, sitt fyrste forsøk på fremme Masfjordsambandet for fylkespolitikarane. Tysdag heldt han eit flammande innlegg om bruprosjektet då kommunestyra i Gulen og Masfjorden hadde sitt årlege fellesmøte i Knarvik.

Planlegginga av Masfjordsambandet, som skal erstatte Masfjordnes-Duesund-ferja, har pågått i fleire år. Tysdag slo Masfjorden-ordføraren eit nytt slag for brua, og oppmoda Gulen og Masfjorden til å kjempe i lag for å realisert prosjektet. Ordføraren meiner brua vil vere ein nøkkel for å tiltrekke seg arbeidskraft og skape lokal folkevekst og utvikling.

– Ferja er eit stort hinder uansett korleis ein vrir og vendar på det, sa Kvamsdal til dei to kommunestyra.

– Person- og godstransport med ferje inneber lang reisetid, ventetid, sårbarheit ved driftsstans og manglande døgnope vegsamband. Det medfører høge transportkostnadar for næringslivet og redusert framkome for personar og varelevering. Dette er kvardagen vår. Dette er slik me har hatt det, og slik me kjem til å ha det i all overskodeleg framtid, fram til vi eventuelt får fastlandsforbinding sørover, fortsette han.

Finansierer seg sjølv

Kvamsdal ønsker at det skal kome tydelegare fram at prosjektet i stor grad blir finansiert av statlege ferjeavløysingsmidlar. Det betyr i prinsippet at pengar ein sparar på å legge ned ferjedrifta skal finansiere brua. Ordføraren har likevel forståing for at det ikkje berre er for fylket å gå i gang med arbeidet, då dei må forskotere investeringsmidlane ved hjelp av låneopptak.

– Me må annerkjenne utfordringane og økonomien til fylket, men det finst løysingar, sa Kvamsdal, og viste til at det stadig blir jobba med å forbetre ferjeavløysingsordninga.

Næringslivet treng arbeidskraft

Kvamsdal meiner ny bru vil kome samfunnet til gode på fleire ulike vis, ikkje minst for næringslivet.

– Tenk på det næringslivet me har i Masfjorden og Gulen, og dei planane dei har. Det er snakk om 500 nye arbeidsplassar. Spørsmålet er kor ein skal få dei 500 arbeidstakarane frå. Denne brua vil gjere det mykje lettare for næringslivet og kommunane våre å rekruttere arbeidskraft frå Alver og Bergen. Ved å binde saman bygdene våre med bru, vil me fjerne ein stor barriere for utvikling og vekst i vår region, forklarte ordføraren.

Han trekte også fram at brua vil vere viktig for beredskap, både som erstatning for ferjesamband og som omveg viss E39 må stenge. Han viste fram ei rekke eksempel på kansellerte avgangar og driftstrøbbel både på Masfjordnes-Duesund og Leirvåg-Sløvåg.

– Ein kan sjå veldig mange andre plassar både i Norge og Vestlandet som har fått bru, kor mykje det har å seie for regional utvikling for dei plassane. De kan tenke dykk korleis Askøy og Meland hadde vore utan bruer i dag, sa Kvamsdal.