Kommunestyret vil overta kaifronten

Torsdag i sist veke skulle kommunestyret i Austrheim avgjere saka om kommunal overtaking av kaifronten på “verftstomta” ved Mastrevik kai. Det er denne tomta kommunen ønsker at fylket skal bygge ny vidaregåande skule på, men for å gjere det meir aktuelt har fylket bedd kommunen om å ta på seg ansvaret med å oppgradere kaifronten.

Formannskapet har vore positive til at kommunen overtar denne delen av tomta og tar ansvaret for oppgradering, men med nokre atterhald. Atterhalda er at:

• Vestland fylkeskommune gjer vedtak om å bygge ny vidaregåande skule på tomta.
• det ikkje er miljøgifter i grunnen som kommunen må ta kostnaden med å handtere.

Til kommunestyremøtet presenterte kommunedirektøren derimot ei anna tilråding til politikarane. Kommunedirektøren tilrådde at kommunen ikkje tar på seg ansvaret med å eige kaifronten, men heller vurderer å bidra med eit eingongstilskot til fylket for å finansiere oppgraderinga.

Kommunen estimerer at oppgradering av kaifronten vil koste kring to millionar kroner.

Diskusjonar i kommunestyret

Plansjef i kommunen, Asbjørn Nagell Toft, utdjupa kommuneadministrasjonen sitt syn då den politiske handsaminga i kommunestyret starta torsdag. Han forklarte at administrasjonen sitt syn er at det er eit for stort ansvar for kommunen å overta ein kaifront der grunnundersøkingar viser spor av miljøgifter, gjeve den utfordrande økonomiske situasjonen kommunen står i.

– Vi går inn i noko vi ikkje veit. Då er det mykje enklare å gje eit tilskot til fylkeskommunen, og så får dei lov til å styre korleis dei vil ha det i forhold til den vidaregåande skulen. Vi bør ikkje gå inn i noko som er usikkert, og dette er ein risiko som vi meiner er stor, sa han til politikarane.

Det var eit splitta kommunestyre som drøfta saka vidare. Varaordførar Per Lerøy (Ap) var blant dei som var positive til formannskapet sitt vedtak, og han poengterte at formannskapet sitt vedtak inneheld atterhald om at kommunen ikkje skal få ekstrakostnadar knytt til forureiningar i grunnen. Han meinte det fjerna risikoaspektet.

Han forklarte også at det blir jobba med å få fylket til å ta ansvar for forureiningane.

– Ordføraren er i dialog med fylkeskommunen med tanke på å få til ein avtale der dei tar på seg forpliktingane med å rydde området, sa Lerøy i møtet.

Lokaliseringsspørsmål

Det er politikarane i fylkeskommunen som skal avgjere kvar den nye skulen skal byggast. Alternativa er “verftstomta” og tomta som skulen står på i dag. Austrheim-politikarane er positive til ny skule uavhengig av tomtevalet, men føretrekker tomta ved kaien.

– Vi må spille korta våre rett no slik at vi får skulen plassert der den er optimalt plassert, sa Per Lerøy i kommunestyremøtet.

Men spørsmålet for Austrheim-politikarane er kor mykje dei vil gjere for å få førstevalet sitt.

Renee Hansen Semmingsen i Samlingslista stilte seg bak kommunedirektøren sitt forslag, og meinte det var godt grunngjeve.

– Eg synast ikkje det er ein nedtur viss skulebygget endar på noverande tomt. Ja, eg og vil ha den nede på slippen, men det er ikkje nedtur for meg viss den endar oppe der vi har den no, sa ho.

Ho fekk mellom anna støtte frå Monika Thorpe (Ap).

– Vi er i den økonomiske situasjonen som vi er, og vi snakkar heile tida om at vi må vere forsiktige og tenke oss om kva vi brukar pengane våre til, kommenterte Thorpe.

Senterparti-politikar Reidar Øksnes stilte spørsmål til om kommunen faktisk veit nok om kva økonomiske konsekvensar det kan få å overta kaifronten.

Per Lerøy svarte med at formannskapet sitt forslag handlar om å tenke langsiktig, og han gjentok bodskapet om at vedtaket frå formannskapet inneheld atterhald knytt til utgifter.

– Når det gjeld forureining tek vi forbehald om at vi ikkje tar påtar oss nokre kostnadar. Det ligg i vedtaket, sa han.

Splitta kommunestyre

Etter gruppemøte og påfølgande gruppeleiarmøte hadde politikarane framleis ikkje blitt einige. Dermed vart det røysta for to ulike alternativ: vedtaket frå formannskapet og tilrådinga frå kommunestyret.

Forslaget frå formannskapet om å overta kaifronten fekk fleirtal med elleve mot seks røyster.

Dei to representantane frå Samlingslista, to av av tre representantar frå Senterpartiet, éin av Ap sine representantar og ein uavhengig representant røysta for forslaget til kommunedirektøren.

Det ligg no i hendene til fylkespolitikarane å avgjere kvar den nye skulen skal byggast. Det skal etter planen skje allereie før sommaren, og den politiske handsaminga er venta å starte i opplæringsutvalet allereie i slutten av april.