Loading
Abonner på vårt vekentlege nyheitsbrev
– Kommunane rundt oss har ganske stor skatteinntektsauke, men ikkje Austrheim.
Det sa økonomisjef Odd Harald Dommersnes då politikarane i Austrheim var samla til kommunestyremøte sist veke.
På agendaen stod ein oppdatert rapportering om den økonomiske situasjonen, og eit av hovudpunkta til økonomisjefen var sviktande skatteinntekter.
Medan nabokommunar som Alver og Fedje har ei auke i skatteinntekter så langt i år på godt over ti prosent, ligg Austrheim på 3,5 prosent auke. Det er langt mindre enn kommunen har budsjettert med.
Den låge skatteveksten ligg an til å koste kommunen over 15 millionar kroner i mindre skatteinntekter i år, men det treng ikkje gå utover den totale kommunerekneskapen. Økonomisjefen forventar at tapet i skatteinntekter blir erstatta med auke i rammetilskot frå staten. På den måten ligg kommunen framleis an til å få budsjettet for 2025 i mål på inntektssida.
Skattesvikten er likevel noko som kan påverka den økonomiske framtida til kommunen.
– Tidlegare har vi vore i ein situasjon at skatteinntektene i Austrheim har lege ganske høgt i forhold til landssnittet, det gjer vi ikkje lenger, forklarte Dommersnes.
– Det gjev utfordringar i forhold til 2026, fortsette han.
For snart startar arbeidet med å lage budsjett for neste år, og då må politikarane ta ei vurdering på om dei vil justere ned forventa skatteinntekter samanlikna med tidlegare år.
– Vi har ein heilt anna utvikling når det gjeld skatt enn resten av dei nære kommunane, og det er så stort at det hadde vore spennende å sjå kva dette er for noko, sa økonomisjefen.
Sjølv om kommunene sine inntekter totalt sett kan halde seg på venta nivå i 2025, slit kommunen med nokre ekstrautgifter, ikkje minst knytt til sosiale ytingar, slik Fensfjorden har skrive om tidlegare.
Denne posten blir no auka opp med 2,2 millionar i 2025-budsjettet. Det må tenast inn på andre måtar.
Kommuneadministrasjonen føreslo nokre punkt der det kan vere mogleg å kutte utgifter ut året, utan at det skal gå utover tenestetilbodet til innbyggarane.
Økonomisjefen la fram fire konkrete punkt som skal spare kommunen for 2,2 millionar i årets budsjett:
Fleire av desse punkta har det også blitt gjort innsparingar på tidlegare i år.
I tillegg til desse konkrete punkta blir det også vist til vidare arbeid med tiltak som mindre innkjøp, strammare styring av konsulentbruk, lågare energibruk og ikkje erstatta stillingar ved naturleg avgang om mogleg.
I tillegg blir enkelte investeringsprosjekt utsett i tid. Det inkluderer oppgradering av kommunehuset som har ei budsjettramme på 1,8 millionar kroner. Også planlagd oppgradering av kommunale vegar til 500.000 kroner blir utsett. Det same gjeld planane om å oppgradere fellesareala ved Årås skule.
Den opphavelege planen til politikarane var å finansiere ein del slike investeringar, inkludert oppstarten av nytt omsorgstun, ved å selje næringsareal ved Mongstad. Kommunen har enno ikkje klart å selje tomta, og det ønsker politikarane å gjere noko med.
Dei gjekk difor inn for eit tilleggsvedtak som inneber å legge ut og presentere kommunen sine næringstomter til sals på eigne heimesider. Det same vil dei gjere med ledige bustadtomter.
Dommersnes avslutta med eit tydeleg bodskap til politikarane.
– Vi kan ikkje bruke meir pengar enn vi har.
På toppen av ein allereie utfordrande økonomisk situasjon, opplever Austrheim kommune svikt i skatteinntekter. Det orienterte økonomisjefen om i sist kommunestyremøte.
