Ordføraren om moglege bompengar: – Vi kan ikkje la vere å snakke om ting sjølv om vi er heilt imot det

Dersom fylkesvegen gjennom Austrheim skal bli utbetra med trafikksikringstiltak som gang- og sykkelveg og nye rundkøyringar, er kanskje bompengar einaste løysinga for å finansiere tiltaka. I alle fall er det det som no blir diskutert i kommunen.

Men bompengar er upopulært, og eit slikt forslag skapar sterke reaksjonar.

I sist kommunestyremøte kommenterte ordførar Morten Sognnes saka, etter at han har fått spørsmål om kor aktuelt det eigentleg er med bompengar i Austrheim kommune.

– Det har jo vore eit frykteleg race på Facebook og forskjellig. Det skapar engasjement dette, og det synast eg er bra, sa han.

Bompengesaka er førebels ikkje blitt ein konkret sak som politikarane skal gjere noko vedtak i, men dukka opp som ei orienteringssak på førre formannskapsmøte.

– Dette var ein orienteringssak som vart tatt opp på grunn av ein førespurnad frå fylket, sa Sognnes, som forklarte at han vil drøfte saka vidare med kommunestyret når det skal vere strategimøte i mai.

Ordføraren sa at han neppe trur det kjem bompengar i kommunen, men at han ikkje vil forskotera ei eventuell politisk behandling.

– Eg kan ikkje ta på forskot eit vedtak i kommunestyret, men det ser jo ikkje ut som det blir så veldig aktuelt, sa han.

Samstundes er det langt mellom midlane fylket sender denne retninga til utbetringar av fylkesvegane, og bompengar er kanskje einaste løysinga viss ein vil ha dei føreslåtte trafikktryggleikstiltaka på plass. Bompengene det er snakk om kan mellom anna finansiere ny gang- og sykkelveg mellom Mastrevik og Kilstraumen.

Sognnes kommenterte i kommunestyremøte at han er opptatt av at ein må kunne diskutere sjølv så betente tema som bompengar.

– Vi er nøydde til å snakke om det. Vi kan ikkje la vere å snakke om ting sjølv om vi er heilt imot det. Det blir tatt ei orientering om det i mai, og så tar vi det derifrå, sa han.

Han kom også med ei oppmoding til alle innbyggarar som lar seg engasjere av bompengesaka. Han er glad for engasjement, men ønsker meir enn berre kritikk.

– Det hadde vore veldig kjekt å sjå nokre forslag til løysing, og forslag til korleis vi skal få til å bygge gangvegar og fortau i kommunen vår, for det er ikkje så sprekt med midlar frå fylket slik det er no, avslutta han.